Nümayəndələr Palatasının Demokrat üzvü Yassemin Ansari müdafiə naziri Pit Heqsetə qarşı impiçment maddələri təqdim edəcəyini açıqlayıb.

Bu barədə “Axios” məlumat yayıb.

Maddələr Heqsetin İranda ABŞ əməliyyatlarını idarə etməsi zamanı vəzifə və Konstitusiya öhdəliklərini pozması ilə bağlıdır.

Ansari bildirib ki, Heqset “ABŞ hərbçilərini ehtiyatsızlıqla təhlükəyə atmaq və təkrarlanan müharibə cinayətlərinə yol vermək” səbəbindən impiçment və vəzifədən uzaqlaşdırılmağa layiqdir.

O, həmçinin Tramp Kabinetinin müharibə ilə bağlı açıqlamalarını “dəli” adlandıraraq, 25-ci düzəlişdən istifadə etməyə çağırıb.

Heqset daxili təhlükəsizlik katibi Kristi Noem və baş prokuror Pam Bondi vəzifədən uzaqlaşdırıldıqdan sonra Demokratların Tramp Kabinetində əsas hədəfinə çevrilib.

Sorğular göstərir ki, Heqset Nazirlər Kabinetinin ən az populyar üzvlərindən biridir və İran münaqişəsinin artan xərcləri onun ictimai imicinə əlavə mənfi təsir göstərir.

Qeyd edək ki, Respublikaçılar Konqresin hər iki palatasına nəzarət edir və impiçmentin Senatda təsdiqlənməsi üçün üçdə iki səs çoxluğu tələb olunur. Bu səbəbdən Ansarinin təşəbbüsünün uğurlu olması ehtimalı azdır.

Ansari Heqseti impiçment etməyi təklif edən ilk demokrat deyil, ötən il Şri Tanedar (Demokrat) Pentaqon rəhbərinə qarşı oxşar addım atsa da, hələlik səsverməyə çıxarılmayıb.

Ağ Ev və Pentaqon isə mövzu ilə bağlı hələlik şərh verməyib.