Argentina millisinin hücumçusu Lionel Messi dünya çempionatları tarixində ən çox məhsuldar ötürmə edən futbolçular sırasında həmyerlisi Dieqo Maradonanı geridə qoyaraq ilk sıraya yüksəlib.

39 yaşlı forvard dünya çempionatının 1/8 final mərhələsində Misir yığmasına qarşı görüşdə məhsuldar ötürmə müəllifi olub.

Bununla da onun mundiallardakı assistlərinin sayı 9-a yüksəlib. Dünya çempionatlarında məhsuldar ötürmələrin statistikası 1966-cı ildən aparılır.

İyulun 4-də Argentina millisi 1/16 final mərhələsində Kabo-Verde seçməsini əlavə vaxtda 3:2 hesabı ilə məğlub edib. Həmin oyunda əvvəlcə üçüncü qol Kristian Romeronun adına yazılmış, məhsuldar ötürmənin müəllifi kimi isə Messi göstərilmişdi. Lakin sonradan FIFA qolu avtoqol kimi rəsmiləşdirib.

Qeyd edək ki, Lionel Messi 2023-cü ildən ABŞ-nin "İnter Mayami" klubunda çıxış edir. O, karyerası ərzində Fransanın PSJ və İspaniyanın "Barselona" klublarının da formasını geyinib. Messi 2022-ci ildə dünya çempionu olub, həmçinin 2014-cü il mundialının gümüş mükafatını qazanıb. O, iki dəfə Amerika Kubokunun (2021, 2024), 2008-ci il Olimpiya Oyunlarının qalibi olub və 8 dəfə "Qızıl top" mükafatına layiq görülüb.